اعتبرت الناشطة السياسية شيماء عيسى اليوم الخميس 22 ديسمبر 2022، خلال حضورها في برنامج في 90 دقيقة على إي أف أم، أن الثقة في مدى شرعية رئيس الجمهورية قد انعدمت، معبرة عن ثقتها في أن الجيش الوطني لن يبقى في دور المتفرج، بعد أن قال التونسيون لا لخارطة طريق رئيس الجمهورية حسب تعبيرها.
وقال عضو جبهة الخلاص:” اليوم الجميع ما عادش عندو أولا ثقة في أنو هذا الرئيس هو شرعي لأن ميزانو محلحل، وثانيا الخروج من الأزمة يأتي عبر الأفكار والممارسة الديمقراطية اللي هي في جوهرها الانتخابات، نحن في أزمة كبيرة هناك تمركز للسلطة في يد رئيس الجمهورية دون وجه حق، خلينالو المساحة والمسافة وأجهزة الدولة والإدارة قاتلو تفضل أعمل خارطة الطريق متاعك اليوم خارطة الطريق هاذيا التوانسة قالولها لا، حسب رايك انت الأجهزة بش يقعدو يتفرجوا، أنا وحدة مالناس عندي ثقة كبيرة وانجم هنا نتكلم في الجيش التونسي، الجيش التونسي مستحيل ما ينجمش يقعد يتفرج، فما قانون في البلاد، لا بد على الجيش التونسي أن يكف عن دعم مسار الانتخابات هاذيا، الانتخابات هاذيا ما عندها وين توصلنا ونحن كقوى ديمقراطية ومعارضة سنمنع الدور الثاني، وعلى الجيش التونسي أيضا أن يقف عن مساندة هذا، لأنو الجيش عندو دور في الانتخابات، أنا بالنسبة ليا عندي ثقة في الجيش أنو هو لن يدخل في هذه الفوضى، الجيش بالنسبة ليه كيفو كيف كل القوى اللي عندها محرار، المحرار هو مدى انخراط الشعب، مدى انخراط المنتخبين، اليوم هذا ما فماش علاش بش نقعدوا نضيعوا في المال العام نضيعو في وقتنا… سنمنع الدور الثاني بكل وسائل التصعيد، بكل الوسائل النضالية والسياسية والتشبيك واللي يمشي في بالك أحنا بش نعملوه، انتهت الفسحة يا قيس سعيد ويا حكومة الفشل، نحنا توة بش نتحملو مسؤولياتنا الكلها، وسنمنع مزيد الخراب والفوضى، وخاصة خارجة الطريق اللي قلنا من النهار اللولاني أنها فاسدة ومش بش توصل، سامحني فاش مازلنا نستناو، مسار قيس سعيد وصل لطريق مسدود ومغلوق، عبث دستوري، فشل انتخابي انهيار اقتصادي، شنوة مازلنا نستناو، نستناوه بش يزيد يعمللنا كي السرديات متاعو كي الجنون والخبل اللي موجود على صفحة رئاسة الجمهورية، تصور بلاد منكوبة خسرت 50 مليار في الانتخابات خرجت بنسبة 8.8 بالميا وهو يقلهم مازال الشوط الثاني، شنوة هذا إلى متى بش نقعدوا نتبعوا في الهبال والجنون هذايا”…
التعليقات